Detidos en Oroso seis integrantes dun grupo especializado no roubo de cable de cobre
Empregaban unha furgoneta para localizar control policiais e asegurar a zona, mentres a outra agardaba información para comezar o roubo
Realizaban as operacións en horario nocturno e con vehículos de alugueiro para evitar ser identificados
Están acusados de participar en 13 subtraccións de cable de cobre
(Garda Civil)
A Garda Civil de Santiago de Compostela desarticulou un grupo criminal especializado na subtracción de cable de cobre e detivo a seis dos seus integrantes no concello de Oroso, aínda que non descartan novas detencións.
A operación, baixo o nome Redcupru, iniciouse o un de maio despois de detectar un roubo de cable do tendido telefónico na localidade de Touro.
No transcurso da investigación, os efectivos identificaron presuntos integrantes deste grupo itinerante, pescudando tamén o seu modus operandi. Este consistía en establecer unha base operativa, en Santiago de Compostela, onde pasaban a noite en vehículos e desde alí se desprazaban a diferentes zonas para a vixilancia e selección de obxectivos.
Preferentemente optaban por zonas boscosas próximas a estradas secundarias onde o trazado do tendido telefónico é paralelo á vía e realizaban a operación en horario nocturno con vehículos de alugueiro co obxectivo de dificultar a identificación dos membros do equipo por parte das autoridades.
Tras seleccionar o obxectivo, o grupo, “perfectamente estruturado e xerarquizado”, segundo a Garda Civil, desprazábase en dous vehículos de forma que o primeiro facía os labores de vixilancia tratando de detectar os posibles controis policiais, transmitindo esta información en tempo real ao segundo vehículo, que agardaba instrucións para comezar o roubo.
Destaca o Instituto Armado que esta práctica, unida á súa gran mobilidade xeográfica e ao constante cambio de localización, complicaba notablemente a súa detección e seguimento por parte das forzas de seguridade.
En base á información recompilada, os investigadores determinaron a posible localización do próximo roubo, establecendo un dispositivo especial de seguimento e vixilancia, o cal conduciu á interceptación do grupo, en plena fuxida, na peaxe da AP-9 en Sigüeiro, Oroso.
Os axentes procederon ao rexistro dos dous vehículos localizando nunha das furgonetas máis de 3.100 quilogramos de cable de tendido telefónico, e na outra, ferramentas de corte, roupa escura e luvas.
Os seis detidos están acusados de trece delitos de roubo de cable telefónico, un de pertenza a grupo criminal, un de danos e un de apropiación indebida.
Ademais, incautáronse de dous vehículos, así como os efectos atopados polo que o cable de cobre foi devolto “ao seu lexítimo propietario, a empresa Telefónica España S. A.”.
