Detido un veciño de Teixeiro como presunto autor de 11 delitos de incendio forestal

O Servizo de Protección da Natureza (SEPRONA) da Garda Civil da Coruña detivo un home como presunto autor de once delitos de incendio forestal dentro da operación Torunda.

A operación iniciouse por mor do incendio rexistrado o día 30 de xullo no termo municipal de Oza-Cesuras. No transcurso da investigación, producíronse outros dez incendios, de pequenas dimensións, co denominador común de situárense todos nas marxes da estrada DP- 0302 (Teixeiro-Coirós) e na área protexida da Reserva da Biosfera das Mariñas Coruñesas e Terras do Mandeo, e afectaron os termos municipais de Coirós, Oza-Cesuras e Aranga.

Durante a análise da información solicitada, a cal contiña datos relevantes achegados pola cidadanía, os compoñentes do SEPRONA contaron coa colaboración da Garda Civil do Posto de Curtis. Como froito do traballo realizado, os axentes lograron identificar o presunto autor dos lumes. 

Unha vez coñecida a identidade, a Garda Civil procedeu á detención deste home como presunto autor de once delitos de incendio forestal, e atoparon durante a inspección do seu vehículo unha botella de 250 ml de alcol de 96º, un envase pechado que contiña bólas de algodón impregnadas en alcol, unha bolsa de plástico con algodón sen impregnar e un chisqueiro. O detido, xunto cos efectos atopados e as actuacións realizadas, foi posto a disposición do Xulgado de Instrución Número 1 de Betanzos, e a Autoridade Xudicial decretou o seu ingreso no cárcere.

A Garda Civil mantén a operación aberta ante a sospeita de que esta persoa poida estar relacionada coa autoría doutros dez delitos de incendio forestal ocorridos este verán nos termos municipais de Curtis, Vilasantar, Sobrado dos Monxes e Melide.

Desde a Garda Civil fan un chamamento á cidadanía para que colabore na protección dos montes a través do teléfono 062 ou de calquera outra canle de denuncia.

 

A conselleira de Medio Ambiente a favor de endurecer as penas contra os incendiarios

A raíz desta deteción e a preguntas dos medios a conselleira de Medio Ambiente e Cambio Climático, Ángeles Vázquez, mostrouse a favor de "endurecer" as penas contra os incendiarios.

"Cando se trata de intencionalidade ten que haber un castigo e, ademais, mesmo diría que se debe de endurecer", afirmou en Lalín, onde participou na presentación da campaña de concienciación sobre a recollida de biorresiduos 'Eu son do marrón'.