Detido un condutor en Vigo tras fuxir a máis de 120 km/h e acabar esnafrado contra un farol

A Policía Local de Vigo detivo un home de 32 anos tras unha persecución por varias rúas da cidade e pola AP-9 durante a que chegou a circular a máis de 120 quilómetros por hora en vías urbanas e obrigou dous axentes a apartarse para evitar seren atropelados.

Os feitos, segundo informou este venres a Policía Local, comezaron ás 4:23 horas da pasada madrugada, cando unha patrulla facía un control de documentación de vehículos na rúa Isaac Peral.

Os axentes observaron entón un turismo que accedía á vía desde Areal a gran velocidade e déronlle o alto, pero o condutor fixo caso omiso ás indicacións policiais, acelerou e invadiu o carril contrario para incorporarse á AP-9.

A partir dese momento iniciouse unha persecución por distintos puntos de Vigo e a súa contorna, incluíndo tramos da autoestrada e rúas urbanas como Ramón Nieto ou a avenida do Tranvía.

A Policía Local sinala que o condutor circulou a velocidades superiores ás permitidas tanto na AP-9 como en varias vías urbanas, onde chegou a superar os 120 quilómetros a hora. Durante a fuxida, varios usuarios da vía tiveron que esquivar o vehículo e o condutor atravesou diversos cruzamentos sen deterse.

Un dos momentos de maior risco produciuse na avenida da Ponte, onde unha patrulla tratou de establecer un punto de corte de tráfico.

Os dous axentes tiveron que apartarse rapidamente para evitar seren arrolados, xa que o vehículo fuxido non freou e continuou a súa marcha.

A persecución finalizou na rotonda situada na confluencia da avenida do Tranvía cunha saída da AP-9, onde un dispositivo formado pola Policía Local e a Policía Nacional bloqueou o paso ao turismo.

O condutor intentou evitar o cerco realizando un xiro brusco, perdeu o control do vehículo e acabou colidindo contra un farol.

Tras inmobilizar o coche, os axentes detiveron o condutor como presunto autor dun delito contra a seguridade viaria e outro de desobediencia grave.