Prisión provisional sen fianza por prender lume no complexo deportivo do Carme en Vigo

A maxistrada decretou prisión provisional, comunicada e sen fianza para o detido por provocar un incendio nas inmediacións da piscina municipal do Carme, situada a 200 metros do que hai unha semana acabou coa vida de catro persoas. Por fortuna aquí non houbo que lamentar danos persoais. O detido é un home de 37 anos, que xa fora detido por feitos similares en Vigo.

Pasaban as once e media da noite cando comezaba o incendio no complexo deportivo do Carme. Segundo as primeiras investigacións, unha limpadora que estaba dentro escoitou dúas explosións, e foron os veciños os que alertaron os bombeiros. A colaboración cidadá foi clave para que a policía detivera pouco despois un home como suposto autor do incendio.

Esta era a imaxe que ofrecía a pasada medianoite o pavillón multiúsos do Carme, no barrio das Travesas en Vigo. Un incendio provocado que comezou ás once e media. Segundo explicou unha limpadora da piscina do complexo, o incendio comezou antes das once e media, cando escoitou dous fortes golpes que a asustaron. Os veciños asustáronse pola altura das lapas, moi preto das súas vivendas. 

Segundo as primeiras investigacións, o autor do ataque rompeu un cristal da porta e guindou ao interior algún obxecto co que prendeu o lume A zona que ardeu tiña colchonetas e material moi inflamable que usa o equipo de natación sincronizada.

A piscina reabriu con normalidade está mañá, porque só ardeu a sala multiúsos anexa á porta principal. Técnicos municipais traballan arreo para recolocar as actividades de adestramento en seco de natación e danza. Os usuarios sorprendíanse segundo chegaban ás instalacións.

Os testemuños de dous veciños que viron saír un home correndo logo de prender fogo foi clave para a detención do home pouco despois. Trátase dun varón de 37 anos, coñecido das forzas da orde, e reincidente por causar incendios e danos en varios puntos da cidade. Esta mañá estaba previsto que pasara a disposición xudicial, imputado dun delito de danos.