Detido en Barcelona por coaccionar e agredir sexualmente 7 menores, unha delas da Coruña

A Policía Nacional detivo en Santa Coloma de Cervelló (Barcelona) un mozo por agresión sexual, coaccións e corrupción de menores. As vítimas tiñan menos de 16 anos; o presunto agresor, 21. Mandáballes gravar vídeos de contido sexual e distribuíaos a través de Internet.

Dáse a circunstancia de que este home xa fora detido polos Mossos d'Esquadra en 2024 e prohibíralle achegarse a un centro escolar da localidade de Sant Boi de Llobregat (Barcelona).

Durante o rexistro da súa vivenda, os axentes atoparon fotografías e varios vídeos de contido sexual de polo menos outras sete vítimas menores, de idades comprendidas entre os 14 e 16 anos, segundo informou este xoves a Policía Nacional nun comunicado.

A investigación iniciouse por mor dunha denuncia presentada ante a Policía Nacional de Santa Cruz de Tenerife, onde unha menor de 14 anos manifestou que unha persoa descoñecida lle solicitaba insistentemente a través de Internet e obrigábaa mediante ameazas a enviar fotos e vídeos espida e a realizarse tocamentos.

A policía puido vincular o detido con outra denuncia dunha menor de 15 anos da Coruña, cuxos feitos delituosos seguían o mesmo modus operandi.

As indagacións permitiron localizar o autor destes feitos, un veciño de Santa Coloma de Cervelló, e identificar polo menos sete vítimas.

A Policía Nacional non descarta que poida haber máis, unha vez realice a análise forense dos dispositivos electrónicos intervidos no domicilio do detido.

Impútalle os delitos de agresión sexual, coaccións e corrupción de menores.