Detida unha veciña de Lugo por conducir durante 25 anos cun carné falso

Unha veciña lucense de 54 anos de idade foi detida pola Garda Civil, tras comprobar que levaba un cuarto de século conducindo o seu coche cun carné falso. Segundo a información facilitada pola Comandancia de Lugo, a sospeitosa foi imputada como investigada polos delitos de falsidade documental e contra a seguridade viaria.

A investigación púxose en marcha o pasado 24 de marzo, cando a Garda Civil sorprendeu á detida ao volante do seu vehículo particular, no alto do Restelo, en Navia de Suarna. Ao solicitarlle a documentación, os axentes da Garda Civil sospeitaron da validez do permiso de conducir que lles presentaba, por incoherencias moi evidentes entre os datos que figuraban no permiso e as bases da Dirección Xeral de Tráfico.

Por iso, interviñéronlle o documento para o seu posterior estudo e para realizar as correspondentes xestións ante a Xefatura Provincial de Tráfico. A investigación concluíu, en primeira instancia, coa conclusión de que a muller detida leva conducindo 25 anos co citado carné falso e foi posta ao dispor xudicial.