Detida unha parella en Lugo que presuntamente repartía cocaína en patinete
Supostamente tamén vendían a droga no seu bar do barrio da Piringalla
Unha parella que presuntamente traficaba con cocaína en Lugo acabou detida. Supostamente, vendían a droga no seu bar do barrio da Piringalla e desprazábanse en patinete eléctrico para repartila polo resto da cidade.
Os veciños da zona foron os que deron a voz de alarma. O negocio comezou a levantar sospeitas polo continuo tránsito de persoas que non consumían nada no propio local.
Unha vez alertada a policía, a comisaría luguesa puxo en marcha un dispositivo para vixiar os sospeitosos. Cando realizaron as comprobacións oportunas, os axentes prenderon a parella e comisáronlles unha vintena de doses de cocaína e mais utensilios para manipular a droga.
Manuel Arias, voceiro da comisaría de Lugo: "Detectaron que un dos donos se desprazaba nun patinete eléctrico por diferentes zonas. Non circulaba con normalidade, senón con excesivas precaucións, o que lles fixo sospeitar que estaba utilizando ese vehículo para entregar a droga".
Este non é o primeiro punto de distribución de droga a través de patinete que se desartella en Lugo. A finais do ano pasado fora detido outro presunto traficante que supostamente tamén repartía cocaína no mesmo medio de transporte.
