Detida unha muller en Palma por agredir sexualmente a compañeiros de colexio da súa filla
Esa testemuña relatou aos investigadores que a menor lle comentara nalgunha ocasión que vía películas eróticas coa súa nai, extremo que foi corroborado posteriormente por outras declaracións
Imaxe de arquivo da Policía Nacional
A Policía Nacional detivo en Palma unha muller como presunta autora dun delito de agresión sexual a menores de 16 anos por bicar e apalpar varios compañeiros de clase da súa filla á saída do centro escolar.
Segundo informou este xoves a Xefatura Superior, a investigación da Unidade de Atención á Familia e Muller (UFAM) iniciouse o pasado mes de xullo despois de que varios alumnos relatasen durante unha charla no colexio que a nai dunha compañeira os bicaba de forma reiterada na comisura dos beizos e lles tocaba os glúteos case a diario ao remataren as clases.
Os investigadores recadaron o testemuño dunha traballadora da Administración que mantivera contacto profesional coa sospeitosa e que a describiu como unha persoa con condutas altamente sexualizadas cara á súa contorna, incluída a súa propia filla.
Esa testemuña relatou aos investigadores que a menor lle comentara nalgunha ocasión que vía películas eróticas coa súa nai, extremo que foi corroborado posteriormente por outras declaracións.
Unha vez verificados os testemuños e activados os protocolos de protección correspondentes, a Policía procedeu este martes á detención da presunta agresora sexual.