Detida no Milladoiro por estafar 6.500 euros alugando a vivenda onde residía

Unha muller foi detida no Milladoiro, en Ames, por presuntamente estafar 6.500 euros co alugueiro fraudulento da vivenda onde ela mesma residía, mediante unha identidade ficticia e apoderándose de cantidades en metálico que nunca chegou a reintegrar.

A Garda Civil informou este venres de que as pescudas se iniciaron o pasado agosto, cando unha patrulla identificou esta persoa por unha infracción en materia de tráfico e a arrestou ao constarlle un sinalamento xudicial en vigor.

Os axentes atoparon no seu poder unha suma inxustificada de diñeiro en efectivo e, a partir desta intervención, os investigadores descubriron que procedía dunha oferta nunha plataforma dixital inmobiliaria, onde a agora detida anunciaba cun alias falso o alugueiro dun piso no núcleo urbano do Milladoiro.

As indagacións determinaron que o domicilio pertencía a unha sociedade mercantil que llo cedera unicamente durante o período estival e que a inquilina carecía de calquera título ou permiso para subarrendalo a terceiros.

A implicada contactaba cos interesados mediante unha liña telefónica rexistrada a nome doutra persoa e concertaba visitas presenciais á vivenda, onde se presentaba como unha familiar da suposta titular e exhibía as chaves do inmoble.

Finalizada a visita e co pretexto de que a vivenda requiría reformas previas á entrada dos novos arrendatarios, esixía o aboamento en efectivo de importes que oscilaban entre os 440 e os 1.200 euros por afectado en concepto de fianzas e mensualidades adiantadas.

Tras entregar un recibo xustificativo e comprometerse a formalizar o contrato e facilitar o acceso ao piso, dilataba os prazos con diversas escusas ata interromper de forma definitiva toda vía de comunicación.

Ata 52 persoas chegaron a interactuar coa ofertante interesándose polo arrendamento.

Os investigadores contactaron con todos os posibles prexudicados, dos cales seis formalizaron a correspondente denuncia.

A operación culminou coa detención da sospeitosa o pasado 18 de outubro no interior dun vehículo estacionado nas inmediacións da súa residencia.

A Garda Civil solicita a colaboración daqueles cidadáns que, nos últimos seis meses, efectuasen algún desembolso ou transferencia en concepto de reserva ou alugueiro de pisos situados na localidade do Milladoiro e non recibisen as chaves nin asinasen o contrato pertinente.