Descontento entre a veciñanza de Vigo polas cortas de árbores anunciadas polo Concello

Só queda un único cartel dos moitos que fixeran esta fin de semana nenos da contorna da rúa Falperra. Alertaban do perigo de que Vigo quede sen árbores e temen que desaparezan especies coma a acacia negra, que o Concello cre que son invasoras, axudan a propagar o lume e poñen en perigo a seguridade cidadá.

"Non di a xente o que non é, estanse pasando un pouco coa vexetación, o pulmón da vida é o verde", comenta un veciño.  

"Non estou de acordo con que as quiten, paréceme que amais de fermosas, é un pequeno pulmón á parte do castro, que a cidade xa está moi amurallada e chea de pedras", di outro. 

Outros amósanse máis comprensivos, coma un que di "penso que isto é protexer as árbores, isto é limpar".

Moitas queixas na contorna do Castro, onde os bancos quedaron sen sombra e as beirarrúas están cheas de ocos baleiros de árbores centenarias que son substituídas por especies foráneas.

Unha protesta á que se suma tamén a Asociación Vigo Centro e que chega ao barrio Navia onde o vindeiro domingo se mobilizarán para evitar a destrución da carballeira de Casaliños.