Desaloxan en Granada un edificio con 46 vivendas afectado polos terremotos
O diagnóstico sobre o estado do edificio é provisional
Edificio desaloxado en Armilla, Granada. (Imaxe cedida polo Concello de Armilla).
Técnicos do Concello de Armilla, en Granada, co apoio dos bombeiros, nunha actuación preventiva desaloxaron este sábado un edificio do municipio con 46 vivendas que podería sufrir danos estruturais provocados por esta semana de terremotos.
Fontes do Consistorio explicaron que o desaloxo do inmoble, un bloque de 46 vivendas, é preventivo e materializouse despois dunha nova inspección do operativo especial activo desde o inicio dos terremotos.
O arquitecto técnico xa pasou polo bloque para comprobar os danos dun edificio no que tamén traballaron os bombeiros, que apontoaron a estrutura e reforzárona con outros traballos no seu interior.
De momento, o diagnóstico sobre o estado do edificio é provisional, xa que está pendente dunha inspección máis en profundidade que se acometerá este próximo luns.
As mesmas fontes explicaron que, a pesar de que o bloque ten 46 vivendas, moitos dos seus moradores xa se foran do edificio o martes pasado, despois do terremoto de 4,8 graos de intensidade con epicentro en Gójar.
Algúns dos inquilinos marcharon temporalmente da cidade, outros están en casas de familiares ou amigos e tres foron reacollidos polo Concello nun hotel da cidade.
Este desaloxo prodúcese horas despois de que o Concello de Armilla desactivara o Plan Municipal de Emerxencias, unha medida tomada ante a diminución dos eventos asociados ao enxame sísmico dos últimos días e despois de que os servizos municipais revisaran a inmensa maioría das vivendas que comunicaran danos.
A medida é un paso máis cara á normalidade que non implica que o traballo na zona acabase, segundo detallaron as mesmas fontes.
