Denuncian trampas de caza nun monte de Mos logo de quedar atrapada unha cadela

O venres Sona, unha cadela de Mos, non volveu á casa, despois do seu paseo habitual polo monte lindeiro á súa vivenda.

Foron dous días de busca angustiosa, pero o peor chegou cando a atoparon atrapada pola pata por unha trampa de caza, deshidratada e en estado de conmoción. Os seus propietarios din que non é a primeira vez que sucede algo similar na zona. Van presentar denuncia para que non se repita e non quede impune.

Sona é unha cadela maior pero forte. O agarimo dos seus propietarios será a mellor das medicinas. Aínda así, esta mañá quedou ingresada nunha clínica veterinaria para recuperarse das feridas.