Denuncian danos nos camiños forestais de Camariñas por mor dos traballos das empresas madeireiras

Os traballos de corta e transporte de madeira en montes de Camariñas están a causar queixas entre os propietarios.

"Temos un problema cos camiños en xeral. Tivemos un compromiso coa Xunta, que nos limpou case todos os camiños veciñais e agora os madeireiros desfannos os camiños todos", explica Manuel Romar, vicepresidente da Asociación A Croa.

"Veñen cortar os piñeiros en pleno inverno, os camiños están brandos e cos tractores grandes que teñen desfán os camiños enteiros", comenta Armindo Canosa, vogal da Asociación A Croa.

Camiños que antes eran transitables e que agora quedaron cheos de lama, con rodadas profundas e treitos intransitables. Os propietarios din que non están en contra do aproveitamento forestal, pero esíxenlles ás empresas madeireiras que restauren os camiños e os deixen como antes de comezar a cortar os montes.

"Este problema xa vén de anos atrás", engade Romar.

 "Cabe destacar que o pequeno madeireiro é unha peza fundamental no sector forestal galego porque conecta o pequeno minifundio e as propiedades con pouca madeira coa industria", di Alejandro Álvarez, enxeñeiro forestal da Asociación A Croa.

"De nada vale que a nós nos quiten a madeira dos montes se nos desfán os camiños", manifesta o vicepresidente da Asociación A Croa.

Así que para tratar de dar cunha solución, desde a asociación presentaron por rexistro un borrador de ordenanza municipal.

"O punto clave desa ordenanza é: regular o uso dos camiños públicos para obter a xestión sostible dos montes. E hai que ter en conta que está feita desde o punto de vista dos propietarios dos montes privados e, en función da cantidade de madeira que se saque, depositarase unha fianza", conta Álvarez.

Polo momento están á espera de que se aprobe no próximo pleno municipal. Con todo, amósanse optimistas.