Debate sobre as consecuencias das atraccións de Nadal en Vigo

Ademais da iluminación, son moitas as atraccións que estes días enchen as rúas de Vigo e atraen milleiros de visitantes. Nun dos espazos en que se instalaron, na rúa Rosalía de Castro, algúns veciños denuncian que a localización non é segura. 

Explican os afectados que temen que non poidan acceder ao lugar coches de bombeiros ou ambulancias cando se producen aglomeracións en toda a contorna.

Mentres, para outros, son un atractivo máis na cidade e para os hostaleiros unha fonte de ingresos. Relatan que os seus clientes aumentaron grazas a estes atractivos.

Dende o Concello aseguran que a instalación conta cun plan de autoprotección que garante a seguridade e o acceso dos vehículos de emerxencias á zona. O alcalde explicou que aínda cos hoteis ao 100 % de ocupación cúmprense tamén as medidas covid.

Nas fiestras da rúa algúns inquilinos están a colgar lazos brancos para denunciar o seu malestar.