Dani Barcia sempre tivo "a intención de quedar" no Deportivo
Barcia pasou por todas as categorías inferiores do conxunto branco e azul ata alcanzar o primeiro equipo
Dani Barcia pasou por todas as categorías inferiores do conxunto branco e azul ata alcanzar o primeiro equipo. Un no que se consolidou e no que seguirá ata xuño do 2028. Días despois do anuncio, tanto o xogador como Fernando Soriano compareceron na sala de prensa de Riazor.
"Pasouse a súa vida defendendo estas cores. É un orgullo que poidas seguir connosco moitos anos máis. Que esta non sexa a última renovación", expuxo en primeira instancia o director deportivo.
Acto seguido tomou a palabra o central da canteira deportivista.
"Estou moi feliz de estar aquí, é o que quixen sempre, axudar ao Dépor. É un soño. Espero poder demostrar a confianza no campo", comentou o deportivista.
"Hai equipos en 1ª como o Celta con case todo xogadores de canteira. Tarde ou cedo chegaremos alí"
"Se esa é a base, podemos competir en primeira"
Engadiu que "sempre tiven a intención de quedar aquí" e que foi "bastante fácil". Ademais, Barcia destacou o importante labor da súa familia.
"Axudoume sempre, estou agradecido de que me levaran polo bo camiño", expuxo, ante a atenta mirada dos seus, que o acompañaron durante a súa intervención.
