Críticas dos comerciantes da zona histórica de Santiago ás medidas de aforro enerxético

Esta semana entraron en vigor as primeiras medidas do decreto do aforro enerxético aprobado polo Goberno, unhas medidas que os comerciantes e empresarios da zona histórica de Santiago consideran ineficaces e prexudicais para o sector. O presidente de Compostela Monumental, José Manuel Bello, reclama axudas para que o perqueno comercio poida adaptar os locais.

O presidente de Compostela Monumental critica que haxa que apagar as luces de escaparates e edificios públicos a partir das dez da noite porque di que é malo para o turismo e crea inseguridade. Tampouco está conforme coas limitacións na temperatura do aire acondicionado ou da calefacción e critica especialmente unha medida que aínda non entrou en vigor, pero que será obrigatoria a partir do 30 de setembro, o peche automático das portas.

"Moita xente non poderá poñer enriba da mesa 8.000 euros que é o que custa unha porta semitautomática, despois hai certos locais, aquí en Galicia non tanto pero en Almería, ou en Córdoba ou Sevilla que con 27 graos é imposible traballar, despois o apagamento das luces ás dez da noite é outra medida que tampouco favorece nada porque crea unha inseguridade enorme dentro das rúas e tampouco crea un bo ambiente nocturno"

José Manuel Bello, que preside tamén a Confederación Española de Cascos Históricos, lembra que na zona vella a maioría das portas son de madeira e adaptarse á normativa podería supor nalgúns casos incumprir a lei de protección do patrimonio. E reclama axudas para evitar peches e destrución de emprego. Asegura que en España xa pecharon 50.000 tendas.

"Teriamos que subvencioinar outro tipo de material que axude que climatizar as tendas debidamente e non prexudicar o pequeno comercio cun real decreto feito de présa e correndo para marchar de vacacións a Lanzarote no Falcon"