Cortan o tráfico na AP-9 esta madrugada entre Santiago e Sigüeiro por obras

O Ministerio de Transportes, Mobilidade e Axenda Urbana (Mitma) informou de que, debido ás obras no enlace Orbital entre a AP-9 e a A-54 á altura de Santiago, será necesario realizar o corte total do tráfico en ambas as calzadas da AP-9 entre os puntos quilométricos 55 (Sigüeiro) e 67 (Santiago Norte) entre a medianoite e as 6 horas do mércores.

Ademais da sinalización habitual reforzaranse os sinais verticais de obra co apoio de paneis variables existentes na AP-9, así como coa implantación de carteis informativos nos puntos inmediatos á saída da autoestrada.

A totalidade do tráfico que circula pola AP-9, en sentido cara á Coruña, abandonará a vía pola saída inmediatamente anterior á zona de obra (saída 67, Santiago Norte) durante a xornada nocturna dos traballos.

Como itinerario alternativo proponse o traxecto pola SC-20 Sentido Norte, se o destino é a A-54 ou o aeroporto da capital galega, e pola SC-20/N-550 con destino Sigüeiro, con posibilidade de retomar alí novamente a AP-9 en sentido A Coruña.

Pola súa banda, a totalidade do tráfico que circula pola AP-9, en sentido Pontevedra, abandonará a autoestrada na saída inmediatamente anterior á zona de obra, en Sigüeiro. Os condutores, para poder continuar a viaxe por autoestrada, deberán realizar o traxecto pola N-550 en sentido Pontevedra, continuar polo periférico SC-20 para tomar de novo a AP-9 na entrada de Santiago Norte. 

Este mesmo corte de tráfico xa se produciu o pasado 21 de xullo pola mesma actuación e nos mesmos puntos quilométricos.