O mozo acusado de matar á nai en Vilagarcía continúa en estado crítico
O investigado precipitouse dende o balcón da súa vivenda, situada nun terceiro andar
As forzas de seguridade descartan, polo momento, a intervención de terceiras persoas
Unha axente no lugar dos feitos
Un mozo de 22 anos está a ser investigado pola morte violenta da súa nai, de 61, no seu domicilio de Vilagarcía de Arousa. O suposto agresor permanece en estado crítico tras precipitarse dende o balcón da vivenda, situada nun terceiro andar.
Ingresado no hospital Álvaro Cunqueiro de Vigo e custodiado pola Policía Nacional, que investiga o sucedido, presenta un cadro clínico de politraumatismos, fracturas diversas e shock hemorráxico.
Segundo fontes do Complexo Hospitalario de Pontevedra, o presunto responsable do crime atópase na unidade de coidados intensivos con prognóstico "moi grave".
Todo apunta a un "matricidio"
O corpo sen vida da muller foi localizado sobre as seis e media da tarde do venres na súa casa da rúa Duque de Rivas. Estaba boca abaixo e cuberto de sangue.
O subdelegado do Goberno en Pontevedra, Abel Losada, declarou á prensa que todo apunta a un matricidio. Asegurou que as pescudas están nunha fase inicial pero, polo momento e con toda a "prudencia", descartan a participación de terceiras persoas.
.png)
