Condenan a dez anos de cárcere o capo vigués vigués Miguel Ángel Devesa por tráfico de cocaína en Costa do Marfil

O capo vigués Miguel Ángel Devesa Mera foi condenado, xunto a outras doce persoas, a dez anos de cárcere por tráfico internacional de cocaína en Costa do Marfil, segundo informaron este mércores medios locais.

O Tribunal Penal Económico e Financeiro de Abiyán, capital comercial do país, emitiu o seu veredicto este martes, cando acabou un xuízo que empezou en 2023. Devesa, un exaxente da Policía Nacional que era considerado o cerebro da trama, tamén foi condenado a unha multa de 50 millóns de francos CFA (uns 76.300 euros) e ao pago de 60.000 millóns de francos CFA (91,5 millóns de euros) en concepto de indemnización por danos e perdas que deberá aboar ao Estado.

O capo foi detido en abril de 2022 na cidade costeira de San Pedro, no sur deste país de África occidental e onde se instalou en 2018, tras o comiso de máis de dúas toneladas da citada droga nesa urbe e no porto de Abiyán. Devesa foi arrestado xunto a outros presuntos integrantes da ruta africana de cocaína, tras unha investigación levada a cabo pola Policía Nacional coa colaboración das autoridades de Ghana e Costa do Marfil.

A organización criminal traficaba por vía marítima e aérea con cocaína desde América do Sur ata África e despois a Europa. Xunto ao xefe da rede foron condenados a dez anos de prisión o colombiano Gustavo Alberto Valencia Sepúlveda, considerado "o notario certificador" (encargado de verificar a calidade da cocaína e o seu control), así como o español Aitor Picabea Carnes, socio de Devesa nunha empresa, entre outros.

Entre os condenados figuran tamén autoridades locais e membros de forzas de seguridade marfilesas. Considerada durante moito tempo unha área de tránsito para as drogas producidas en América Latina, África occidental e central convertéronse nunha rexión de alto consumo, segundo a Oficina das Nacións Unidas contra a Droga e o Delito (UNODC). Segundo a UNODC, entre 2019 e 2022 incautáronse polo menos 57 toneladas de cocaína en África occidental ou de camiño á rexión.