Condenan o matrimonio que encerrou os fillos nunha casa en Oviedo a 2 anos e 10 meses

A Audiencia Provincial de Asturias condenou a dous anos e dez meses de prisión os pais que mantiveron encerrados durante case tres anos e medio os seus tres fillos nunha casa situada na contorna de Oviedo, informou a Fiscalía do Principado.

A sentenza condénaos a cada un deles a dous anos e catro meses de cárcere por un delito de violencia psíquica habitual no ámbito familiar e a outros seis meses de prisión por un delito de abandono de familia, mentres que os absolve do delito de detención ilegal do que estaban acusados.

Os proxenitores, un alemán de 53 anos e unha muller de 48 con dobre nacionalidade, alemá e estadounidense, estarán inhabilitados durante tres anos e catro meses para exercer a patria potestade ou tutela, tempo durante o que tampouco poderán comunicarse con eles, e en concepto de responsabilidade civil deberán indemnizar a cada un deles con 30.000 euros.

A Fiscalía solicitaba para cada un dos proxenitores, que foron xulgados o pasado mes de marzo, un total de 25 anos polos delitos de violencia psíquica habitual no ámbito familiar, abandono de familia e detención ilegal.

Os nenos, dous xemelgos que agora teñen 9 anos, e o seu irmán maior, de 11, que estiveron encerrados nunha casa unifamiliar preto de Oviedo entre decembro de 2021 e abril de 2025, están baixo a tutela dos servizos sociais do Principado. 

Durante o xuízo, o matrimonio admitiu que a situación familiar era anómala, pero insistiu en que sempre tratou de facer o mellor para os nenos.

A defensa sostivo ante o tribunal que non podía falarse de detención ilegal senón dun "illamento voluntario" por parte duns pais que estiveran enfermos de coronavirus, e que presentaban un "medo insuperable" a enfermar de novo, polo que decidiu autoconfinarse e educar os seus fillos na casa.

Ademais, os avogados dos pais lamentaron que os feitos derivasen nunha causa penal, cando ao seu xuízo a situación poderíase afrontar desde o ámbito dos servizos sociais.

A Fiscalía, que si cualificou os feitos de detención ilegal, remarcou que os nenos estiveron privados das súas necesidades educativas, sanitarias, emocionais e sociais durante case tres anos e medio nos que non tiveron comunicación algunha co mundo exterior, xa que nin sequera saían ao xardín.

A situación en que se atopaban os nenos coñeceuse o 28 de abril do pasado ano por mor da chamada dunha veciña e desde entón están baixo a tutela dos servizos sociais do Principado, mentres que os pais se atopan en prisión preventiva e non volveron a ver os fillos, aínda que si manteñen contacto telefónico con eles.