Condenados a entre nove e dez anos de cárcere catro acusados de introducir 651 quilos de cocaína polo porto de Vigo

A sección quinta da Audiencia Provincial de Pontevedra, con sede en Vigo, condenou a penas de entre nove e dez anos e sete meses de cárcere a catro acusados de introducir 651 quilos de cocaína en palés de babanas polo Porto de Vigo.

Na sentenza, os maxistrados consideran aos catro procesados como membros dunha organización dedicada á introdución en España de cocaína procedente de América do Sur.

Os sospeitosos foron detidos o día 26 de abril de 2023, cando foi interceptado en Vigo un camión con 651 quilos de cocaína, cun valor no mercado ilícito de máis de 25,5 millóns de euros.

No seu fallo, a Audiencia relata que, entre os meses de xullo de 2022 e abril de 2023, por mor de información de cooperación policial internacional, "levouse a cabo unha investigación acerca dunha trama de persoas estruturada e sostida, que tería o obxectivo de manter modos estables de introdución de cargamentos de cocaína disimulados na carga lícita de contedores de tránsito comercial provenientes de América do Sur, a través, entre outros, do porto de Vigo, onde se substituirían os palés cargados en orixe con cocaína por outros idénticos aos transportados para garantir que a operación non fose descuberta".

O tribunal considera probado que a estrutura organizativa estaba dirixida por unha persoa non axuizada e que semanas antes, en marzo de 2023, se realizou un primeiro envío de contedores de plátanos nun dos cales se introduciran palés con cocaína, que foi incautada xa en Colombia.

Despois, en abril dese ano enviouse un segundo cargamento, que estaba a ser seguido grazas á intervención de axentes encubertos "debidamente autorizados".

Cocaína en Vigo 

Tamén se considera probada a chegada do contedor ao porto de Vigo e a intervención do camión cos palés, así como os informes periciais que confirmaron a substancia e a súa pureza.

A Sala rexeitou as cuestións previas por falta de acreditación de vulneración grave de dereitos ou de provocación, entendendo que a actuación policial foi meramente investigadora e que as posibles deficiencias formais non contaminan a proba.

Desta forma, condena a un dos acusados a dez anos de prisión e ao pago dunha multa de 70 millóns de euros; a outro dos sospeitosos, respecto ao cal ten en conta a agravante de reincidencia, a dez anos e sete meses de prisión e ao pago tamén de 70 millóns de euros, e a cada un dos outros dous acusados, imponlle nove anos de prisión e unha multa de 50 millóns de euros.

A pesar de todo, a sentenza non é firme, xa que cabe interpoñer recurso de apelación ante a Sala do Civil e Penal do Tribunal Superior de Xustiza de Galicia (TSXG).

Xuízo

O xuízo levouse a cabo o pasado mes de maio na sección quinta da Audiencia Provincial de Pontevedra. Durante as distintas vistas, as defensas dos acusados apuntaron a un posible "delito provocado" polos propios funcionarios encubertos. Agora, os maxistrados rexeitan ese argumento.

Pola súa banda, un destes axentes destacou que se trataba dunha organización moi asentada e con experiencia neste tipo de feitos.

A pesar de todo, a Audiencia só condena os catro procesados, debido a que o xefe da trama, Damián G.U., non foi axuizado porque está en paradoiro descoñecido.