Condenado a 11 anos de prisión por agredir sexualmente unha clienta con discapacidade en Láncara

A Sección Segunda da Audiencia Provincial de Lugo condenou a 11 anos e tres meses de prisión un home por un delito continuado de agresión sexual contra unha clienta súa con discapacidade na Pobra de San Xiao, no concello lugués de Láncara.

A sentenza considera acreditado que o acusado aproveitou a situación de vulnerabilidade da vítima para sometela a diversos actos de carácter sexual entre novembro de 2023 e abril de 2024.

Os feitos producíronse no establecemento comercial que rexentaba o condenado, ao que a muller, cunha discapacidade recoñecida do 65 %, acudía habitualmente como clienta. Segundo recolle a resolución xudicial, o procesado realizou múltiples chamadas telefónicas para que a denunciante acudise á tenda e, unha vez alí, levou a cabo distintas agresións sexuais, chegando a violala, a pesar de a oposición manifestada pola vítima en numerosas ocasións.

O tribunal considera plenamente crible o relato da muller, destacando que está corroborado tanto polas declaracións das testemuñas como polos informes periciais incorporados á causa. Ademais, a Audiencia resalta a existencia das numerosas chamadas efectuadas polo acusado para lograr que a denunciante acudise ao seu negocio.

"A razón que expón é totalmente ilóxica e incrible, pois dicir que a chamaba para que lle deixase en paz é totalmente absurdo, porque ben podería dicirllo cando acudía á tenda, sen que teñan xustificación esas chamadas reiteradas", matiza a sentenza.

Xunto á pena de prisión, a sentenza impón ao condenado o pago dunha indemnización de 30.000 euros á vítima polos danos morais sufridos. Tamén lle prohibe achegarse ou comunicarse con ela durante un período de 15 anos. A sala absolve, pola contra, ao acusado do delito leve de ameazas polo que tamén fora xulgado.

Alegou que era a muller a que o chamaba a el

Durante a vista oral, celebrada na Audiencia Provincial de Lugo, o home negou os feitos e asegurou que nunca mantivera relacións sexuais coa denunciante. Segundo a súa versión, era a muller quen o acosaba e as chamadas telefónicas realizadas tiñan como único obxectivo pedirlle que deixase de insistir. A vítima prestou declaración mediante proba preconstituida e a porta pechada para preservar a súa intimidade.

A Fiscalía solicitara inicialmente 13 anos de prisión por un delito de violación continuada, alén doutras medidas accesorias. Finalmente, a Audiencia Provincial conclúe que existían probas suficientes para condenar ao acusado por agresión sexual continuada, ditando unha pena de once anos e tres meses de cárcere.