Concentracións en varias cidades galegas contra as listas de agarda no Sergas

A plataforma SOS Sanidade Pública deu lectura este xoves en Vigo un manifesto no que esixiron coñecer "os datos reais" das listas de espera. Segundo indicaron, o conselleiro de Sanidade, Antonio Gómez Caamaño, "sabe que as listas que se publican non son as reais" e os procedementos que se "utilizan para ocultar un número moi importante de persoas concretas que están a esperar por unha consulta, unha proba ou unha intervención cirúrxica".

Así, indicaron que "existe unha gran variedade de instrumentos de xestión para falsear e maquillar" as listas de espera. Entre elas, mencionaron atrasar o acceso dos pacientes a consultas e probas dificultando a derivación desde Atención Primaria; realizar chamadas telefónicas en momentos nos que existe maior probabilidade de que os pacientes rexeiten a intervención, ou colocar ao paciente en situación de espera médica, por solicitude de interconsultas ou probas.

Outras estratexias, sinalaron, pasan por ofrecer a derivación a centros concertados privados a pacientes que desexan ser intervidos no sistema público, para que o rexeiten e así colocalos en lista de espera non estrutural; ou propoñer cambios arbitrarios da data da citación para intervencións, probas e consultas.

"Esiximos deixar de discutir sobre as cifras, esiximos coñecer os datos reais das persoas que están en calquera lista de espera ou pendentes de citas", proclamaron desde SOS Sanidade Pública.