Detida unha moza por intentar matar cunha arma branca un mozo en Cangas
A moza ingresou en prisión acusada de tentativa de homicidio
A Garda Civil detivo unha muller de 20 anos, veciña de Cangas de Morrazo que, presuntamente, intentou matar cunha arma branca un home durante unha pelexa.
Os feitos tiveron lugar o pasado sábado nunha vivenda de Cangas, onde presuntamente se pelexaron varios mozos.
A patrulla de servizo que acudiu ao aviso da Central Operativa atopouse no relanzo dun edificio cunha muller e dous homes, un dos cales tiña varias feridas realizadas supostamente cunha arma branca pola muller que se atopaba no lugar.
Dada a gravidade dos feitos, a vítima e a presunta agresora foron trasladados ao hospital.
Tras o avance da investigación, o mesmo día dos feitos, a Garda Civil detivo a moza como presunta autora dun delito de homicidio en grao de tentativa.
A detida foi posta á disposición dos xulgados de Cangas, que decretou o seu ingreso en prisión.
