Comezan en Vimianzo as obras de prolongación da autovía da Costa da Morte
Son 5,8 quilómetros que teñen un investimento de 36 millóns
A Xunta inicia en Vimianzo as obras de prolongación da autovía da Costa da Morte. Cun investimento de 36 millóns, a actuación na AG-55 abarca un total de 5,8 quilómetros, desde Santa Irena ata a conexión coa estrada AC-532. Todo o percorrido discorre integramente por Vimianzo.
As obras comezaron na zona onde termina o treito de autovía actualmente en servizo, libre de peaxe e que conta cun total de 28 km, e inclúen nesta primeira etapa traballos de roza e movemento de terras así como traballos de investigación xeotécnica para determinar as características do terreo.
A nova vía evitará cruzar Vimianzo a todo o tráfico cara a Camariñas ou A Ponte do Porto. Estará libre de peaxe e prevese que as obras duren aproximadamente dous anos e medio.
A prolongación desta autovía construirase inicialmente cun carril para cada sentido con zonas de adiantamento. Pero quedará preparada para un futuro desdobramento se o tráfico o require, tal e como se fixo na autovía Santigo-Noia.
