Comeza o xuízo pola morte de Yoel Quispe no Nadal de 2023
Un xurado xulgará tres procesados
A Fiscalía só acusa un deles e pide 14 anos de cárcere como autor material do homicidio
A Audiencia Provincial da Coruña celebra do 1 ao 12 de xuño o xuízo, con Tribunal do Xurado, contra tres mozos acusados da morte de Yoel Quispe, o mozo de 22 anos falecido despois de ser apuñalado na Noiteboa de 2023 na zona da rúa Juan Flórez, na cidade herculina.
En concreto, o 1 de xuño procederase á constitución do Tribunal do Xurado e á exposición das partes presentadas dos feitos que consideran probados ou non. Tras declararen testemuñas, policías e peritos, o día 12 procederase á lectura dos informes finais, con posibilidade dos procesados de exerceren o seu dereito a tomar a última palabra.
O 15 de xuño, entregarase o obxecto do veredicto. Fronte á postura da Fiscalía, con petición de 14 anos de prisión por homicidio para o único mozo que está no cárcere e de sobresemento da causa para outros dous, a familia defendeu desde o inicio que os tres debían ser xulgados por asasinato.
En relación ao seu grao de implicación, consideran autor material do asasinato o mozo que está en prisión e cooperador necesario o que, segundo esta parte, levaba a navalla e lla facilitou ao anterior, con implicación tamén dun terceiro.
Así o recolle tamén o auto, que sitúa o presunto autor da puñalada mortal como responsable de asasinato, o segundo como cooperador necesario deste delito e o terceiro como encubridor, o cal supón unha variación das penas de ata 25 anos de prisión para os dous primeiros, segundo o letrado da familia, e de tres anos para o terceiro.
Os feitos sucederon no centro da Coruña, na confluencia das rúas Sinfónica de Galicia e Juan Flórez, contra as seis e media da mañá do 24 de decembro de 2023.
Segundo a Fiscalía, no transcurso dunha lea, Yoel Quispe foi agredido con patadas e puñazos que lle causaron traumatismos na cabeza e outras lesións.
O mozo faleceu como consecuencia dunha coitelada mortal que supostamente lle propinou un dos tres procesados, o único que permanece en prisión provisional.
A Fiscalía só acusa este individuo e pide para el 14 anos de cárcere por homicidio. Porén, a familia da vítima acusa os tres procesados de asasinato e pide para eles 25 e 15 anos de prisión.
Testemuñas da pelexa indicaron que a vítima foi agredida por un grupo de sete ou oito persoas.
O Xulgado do Penal Número 3 da Coruña xa condenou, este pasado mes de abril, dous mozos por agrediren a Yoel Quispe. Os procesados aceptaron nove meses de prisión e pagar 1.500 euros en concepto de responsabilidade civil.
