Comeza o prazo para escoller a palabra do ano 2025
As suxestións dos cidadáns recóllense desde hoxe e ata o 1 de decembro no Portal das Palabras da Real Academia Galega
Non hai un único criterio nin ferramenta para escoller a palabra do ano, que despois quedará gravada no Paseo das Palabras de Lugo.
A iniciativa para escoller a de 2025 presentárona hoxe e contáronnos que moitos anos os galegos escolleron coma quen fai un resumo da actualidade.
"É o que chamamos a palabra-crónica, que a xente escolle para definir o que foi o ano, e tamén foron frecuentes outros anos as que denominamos palabras-esperanza, que poñen a mirada no futuro, como 'irmandade' ou 'afouteza'", dixo Víctor Freixanes, impulsor desta iniciativa da RAG e a Fundación Barrié.
Palabras necesarias que quedarán talladas en granito como memoria do que somos.
