Comeza o Ano Castelao cun acto cívico en San Domingos de Bonaval no 75 aniversario do seu pasamento
Comeza o Ano Castelao cun acto cívico en San Domingos de Bonaval no 75 aniversario do seu pasamento
A Fundación Castelao, o Consello da Cultura Galega e o Museo do Pobo Galego organizaron a homenaxe conxunta coincidindo co 75 aniversario do pasamento, o 7 de xaneiro de 1950 en Bos Aires
O acto cívico para conmemorar o 75 cabodano de Castelao ateigou a igrexa de San Domingos de Bonaval. As principais institucións e entidades culturais do país asistiron renderlle homenaxe, nunha cerimonia que quixo celebrar a vida e a traxectoria da figura máis senlleira do galeguismo do século XX.
O presidente da Fundación Castelao, Miguel Anxo Seixas, explicou no Diario cultural que as pompas fúnebres en Bos Aires poderían equipararse a un funeral dun xefe de Estado. "A xente sabía que morrera un símbolo e nacía un mito".
Nos discursos lembraron o Castelao artista, o escritor e -sobre todo- o pensador, político e patriota galego; poñendo o foco na defensa que fixo da cultura, da lingua e do país.
A cerimonia foi o arranque oficial do ano Castelao, que programará distintos eventos ao longo de todo este 2025 para difundir a figura, a obra e o pensamento do rianxeiro máis universal.
O BNG quere que se recoñeza oficialmente a Castelao como primeiro presidente de Galicia. Os nacionalistas anuncian que levarán esa petición ao Parlamento para o seu debate. Nun acto polos 75 anos do seu pasamento, Ana Pontón recordou que Castelao fundou no Uruguai o Consello de Galiza, que pretendía ser un goberno no exilio.
