Comeza a semana grande das Festas da Peregrina en Pontevedra
A ocupación hoteleira na cidade supera o 90 % nestas datas
Pontevedra comeza este luns a súa semana grande, a das Festas da Peregrina. As previsións de ocupación e negocio do sector servizos son optimistas. A ocupación hoteleira vai ser superior ao 90 por cento, de feito xa quedan moi poucos cuartos dispoñibles nos hoteis da cidade.
Son datos similares á época previa á pandemia. Bares e restaurantes teñen tamén moi boas expectativas. Agardan compensar con esta semana, en que esperan terrazas e locais cheos, outras épocas do ano de menor actividade.
Tras dous anos sen poder celebralas ao cen por cento, a cidade do Lérez recupera as Festas da Peregrina coa mesma forza que antes da pandemia. Rúas cheas de xente e aloxamentos turísticos ao tope.
Agosto en xeral está a ser un mes con moi bos datos turísticos. Os bares e os restaurantes nótano e as expectativas para esta semana son inmellorables. Vai ser difícil atopar sitio en calquera terraza do centro.
As previsións do tempo son boas, o que axudará, sen dúbida, a que a semana grande da Peregrina teña o éxito de público que todos agardan.
