O profesor acusado de abusar de cinco alumnas en Lugo alega que "é unha fabulación colectiva"
O caso destapábase en maio do 2024 cando varias alumnas, todas de primaria, denunciaban o profesor de música por realizarlles tocamentos
A Fiscalía só formula acusación para unha das vítimas e pide cinco anos de cadea
A acusación particular solicita seis anos de prisión por cada unha das vítimas, 30 en total
O profesor de música acusado de abusar de cinco das súas alumnas no colexio de Albeiros, todas nenas de primaria, foi o primeiro en prestar declaración no xuízo que comezou este luns na Audiencia Provincial de Lugo, negou os feitos que se lle imputan e atribúe a súa situación á creación por parte das menores de “unha fabulación colectiva”.
O Ministerio Público só formula acusación por unha das supostas vítimas, en función do informe emitido no seu día polas psicólogas do Instituto de Medicina Legal de Galicia (Imelga), que só lle deu credibilidade a ese testemuño, pero a acusación particular eleva ese número a cinco menores.
Este suposto caso de abusos sexuais no ámbito escolar foi destapado en maio de 2024, por mor de que varias alumnas denunciasen que o profesor lles realizara tocamentos durante as clases de música nese colexio da zona norte de Lugo.
A preguntas do ministerio fiscal, o docente asegurou este luns en sede xudicial que, nun primeiro momento, cando tivo coñecemento desa denuncia, que o levou a pasar entón máis de cinco meses en prisión preventiva, non lle atopou “explicación” a esas denuncias por parte das súas alumnas.
Despois, “pensándoo” e pasado “o tempo”, chegou á conclusión de que as denuncias viñeron motivadas por unha “percepción que non se corresponde coa realidade” por parte das nenas. Así como a que “se retroalimentaron entre elas” e tamén a que se “retroalimentaron os pais de través dos grupos de WhatsApp”.
Explicou que nas clases de música os alumnos estaban “todo o tempo en movemento” e recoñeceu que “é posible” que nalgún momento tocase algún deles, pero asegurou que nunca “con connotacións sexuais”.
“Nunca toquei ningún neno con connotacións sexuais”, asegurou o profesor, de 49 anos, quen tamén explicou que traballou como profesor de música nese colexio durante uns seis anos, así como que daba clases de música a todos os grupos do centro, en total 17.
“Tampouco é normal en min tocar os alumnos. Son bastante escrupuloso con iso", engadiu o acusado, quen tamén asegurou de forma rotunda que nunca tocou ningunha alumna por baixo da roupa. Ao seu xuízo, “retroalimentáronse e crearon unha fabulación colectiva”.
Ao ser preguntado pola súa relación coa nena pola cal presenta acusación o ministerio fiscal, dixo que era “correcta”.
O fiscal pide para o acusado cinco anos e seis meses de cárcere por un delito continuado de agresión sexual a unha menor, así como que indemnice á vítima con 2.500 euros.
Con todo, a acusación particular considera que hai cinco vítimas e pide para o acusado seis anos por abuso sexual a cada unha delas, en total trinta anos de reclusión, así como unha indemnización de 6.000 euros para cada unha das menores.
A letrada Paula Salvador, que leva a acusación particular en nome das familias de tres das cinco nenas denunciantes, entre elas a que motivou a comparecencia na causa por parte da Fiscalía, lembra que, a pesar do citado informe do Imelga, “a credibilidade” das denunciantes debe ser avaliada pola “Sala, que é a que debe” determinala “en base aos parámetros que establece o Tribunal Supremo”.
“É un tema moi delicado, estamos a falar de menores. O teu levas ao teu fillo ao colexio, pensando que vai estar coidado, nas mellores mans, e que de súpeto veñan as nenas contando isto…. É algo moi doloroso”, dixo a avogada, que lembrou que as declaracións tanto das vítimas como das testemuñas “son coincidentes”.
A avogada Sandra Regueira, que exerce a acusación particular en nome doutra das nenas, tamén sinalou en declaracións aos medios antes do xuízo que “as familias pasárono moi mal”, pero chegaron a este momento “para que se faga xustiza”.
“Imos tratar de que se crea a todas as nenas e pedir penas por todas elas. Defendemos a verdade, desde logo”, engadiu a letrada.
Pola súa banda, o avogado da defensa, Juan Carlos Fernández López-Abad, precisou que o informe do Imelga que puxo en dúbida a credibilidade do testemuño de catro das cinco denunciantes é “unha proba importante, pero non definitiva, porque a última palabra tena a Sala”.
Recoñeceu que o seu cliente está “preocupado”, porque “é consciente do risco”, pero ten “a convicción clara de que el é inocente e é o que vai manter”.
“Temos que ser especialmente cautos á hora de expresar a nosa opinión, porque hai menores polo medio, pero si, imos pedir a libre absolución”, engadiu.
