Collen na allada uns ladróns que roubaban aceite nun inmoble de Ribeira

Foi un particular o que avisou a Policía Local preto da unha da madrugada do domingo. Explicaba que estaba vendo uns mozos entrar nun inmoble da rúa de Galicia. O propietario, que usa a casa como almacén doméstico, pechara con chave e non estaba, pero os asaltantes forzaran a porta.

Os axentes levaron ao calabozo un dos presuntos ladróns. O outro escapou despois de deixar tirado no chan o curioso botín: dúas garrafas e cinco botellas de aceite, valoradas nuns cen euros.

O único detido xa foi posto en liberdade á espera de que se celebre o xuízo.