Por fin chove, para ledicia de todos
Por fin chove, para ledicia de todos
As precipitacións non serán suficientes para paliar a seca, pero dan un alivio
Nunca chove ao gusto de todos, menos nesta ocasión, que todo o mundo di que a chuvia é benvida e necesaria.
Había ganas de que chovese e os prognósticos meteorolóxicos avisaron de que ía chover. Pero aínda así hai a quen a auga o colleu por sorpresa nun verán no que xa non se sabía nin onde estaba o paraugas.
A meteoroloxía mudou xusto na ponte festiva por excelencia na nosa comunidade, pero nin os máis trouleiros se anoxaron por volver á esencia propia dos veráns galegos.
Cos xardíns e as hortas case secas e problemas na billa en boa parte de Galicia, xa se resaltan os beneficios a curto prazo destes primeiros chuvascos do verán.
Malia a todo a primeira fronte do verán non mollará toda a Comunidade nin será suficiente para paliar a seca. Nas comarcas máis molladas, como a de Santiago, as estacións meteorolóxicas apenas recolleron 15 litros por metro cadrado.
A auga non será moita nin vai durar, as previsións din que o xoves regresa o anticiclón e con el, o tempo seco e solleiro de novo.
