Chove en Santiago, un plan turístico pasado por unha auga moi valorada

Os paraugas e os chuvasqueiros volveron a Santiago. A chuvia deu contadas treguas que turistas e peregrinos aproveitaron para facer os retratos de rigor. Neste seco e caloroso verán os nosos visitantes valoran a poallada como unha auténtica bendición apostólica.

"Veño dun sitio que estamos a corenta graos de noite e esta humidade é unha bendición", reflexiona un andaluz. "A chuvia é marabillosa cando vés de Castela", asegura outra turista.

Esta foi a banda sonora de hoxe para moitos camiñantes. Algunhas chaparradas complicaron a andaina pero non fixeron decaer o espírito estoico dos peregrinos. Cando menos, iso din. 

"Ben, claro, estamos camiñando, somos peregrinos, empezou a chuvia e tiven que poñer o poncho, logo entrar nun bar, café con leite..."; "Empecei en Coímbra con moi bo tempo, cando entras en Galicia e todo vira verde, agora entendes por que"; "Camiñamos trinta días e hoxe foi o primeiro que houbo tanta chuvia, mollado pero feliz", son comentarios de varios peregrinos.

A ringleira para ver a catedral tampouco encolle. Vir de vacacións a Galicia ten estas cousas e as bategadas non anulan os plans dos que queren coñecer e gozar da nosa terra.

"En Galicia chove e non cambiamos os plans, hai que aproveitar", di unha moza. Outro turista conta que está en Cambados e que xa pensaban vir a Santiago, e un terceiro visitante explica que está aloxado en Vilagarcía e que cadrou a chuvia no día que xa contaban con coñecer a cidade.

Nunca choveu que non escapara, pero hoxe toca mollarse.