As altas temperaturas cederon protagonismo ás treboadas ao final do día na Mariña e na Montaña

 A Xunta de Galicia activou o nivel de alerta laranxa por posibles tormentas e episodios de fortes choivas en zonas de montaña da provincia de Lugo durante a tarde deste domingo.

O Goberno galego indica que, de acordo cos prognósticos da Axencia Estatal de Meteoroloxía (Aemet), esperábase que a partir de primeira hora da tarde poidan rexistrarse episodios de precipitacións de ata trinta litros por metro cadrado nunha soa hora, sen embargo finalmente non se deron. As tormentas poderían traer consigo refachos de vento moi fortes e saraiba.

Todo iso nun día de elevadas temperaturas que obrigou a decretar o nivel de alerta vermello, o máximo existente, en varios puntos da comunidade, onde os termómetros superan os trinta graos Celsius de forma xeneralizada e chegan a rozar os corenta nos puntos de máis calor.

En previsión de posibles tormentas, boa parte das actividades deportivas federadas ao aire libre en áreas como a montaña lucense quedaron suspendidas á espera dunhas condicións meteorolóxicas máis favorables.

Ante a perspectiva de que poidan darse fortes choivas en períodos moi breves de tempo, a Xunta recomenda circular con precaución e informarse do estado das estradas antes de iniciar os desprazamentos; o mesmo que non atravesar zonas alagadas ou en risco diso e non aparcar preto da canle de ríos.