Catro vítimas do atropelo múltiple de Vilanova continúan hospitalizadas
Nas últimas horas foi operado o menor que sufrira unha hemorraxia abdominal no CHUS de Santiago, o seu estado é estable dentro da gravidade
A Garda Civil continúa a investigar as circunstancias en que se produciu o atropelo no interior do recinto onde se celebraba un concerto durante as festas de Vilanova e que deixou 18 persoas feridas. 14 dos feridos xa foron dados de alta, mentres que outros 4 permanecen ingresados.
Nas últimas horas foi operado cirurxicamente o menor que sufrira unha hemorraxia abdominal no Complexo Hospitalario Universitario de Santiago. O seu estado é estable dentro da gravidade.
A mesma evolución rexistran as dúas persoas que están na UCI do Hospital Álvaro Cunqueiro de Vigo e do Hospital Montecelo de Pontevedra, esta última unha muller de 66 anos que sufriu un politraumatismo grave. A cuarta das vítimas hospitalizadas, atópase ingresada no Hospital do Salnés cunha "evolución clínica favorable".
Nas últimas horas, os médicos dérolle o alta a unha quinta persoa que tamén estaba hospitalizada, neste caso na planta do hospital de Pontevedra. Trátase dun home de 27 anos que sufriu unha luxación de rótula no atropelo.
