Case dous meses sen teléfono na única parada de taxis que hai en Betanzos
Desde o Concello informan de que o van repoñer
É a quinta subtracción nos últimos tres anos, que amola tanto os profesionais como os usuarios
Sen teléfono desde o pasado 24 de xullo. Así están na única parada de taxis que hai en Betanzos. O terminal estaba gardado nunha caixa metálica da que só os profesionais teñen a chave. Porén, quen o roubou conseguiu abrila e levalo.
"Porque soa e como ninguén o colle, rómpeno. Tiran do cable e xa está...", explica un taxista.
Unha situación que dificulta o traballo dos taxistas que operan de xeito independente. Aos que o fan baixo o servizo de emisoras como Radio Taxi Betanzos, Radio Taxi Coruña ou Tele Taxi, a falta dese teléfono, non os amola tanto.
"A nós menos porque traballamos con emisoras. Os usuarios... se queren chamar á parada, pois non. Porque aínda que haxa taxis, non os hai", di un dos profesionais de Betanzos.
"E o que teña unha urxencia... como non saiba os teléfonos dos taxistas... non pode chamar. E amais iso é privatizar o servizo. É como se eu digo que o meu teléfono é o teléfono da parada", di outro taxista.
Tamén os usuarios están irritados. E nesas está o Concello que asegura que, nos últimos tres anos, xa roubaron da parada cinco teléfonos.
