Case 200 participantes de oito países compiten nas probas de agility en Silleda

Desde o xoves celébrase en Silleda unha competición internacional de agility con preto de 200 participantes de oito países diferentes. Ademais de probas que puntúan para o campionato de España, o sábado repartíronse máis de 400 euros en premios para guías e cans que demostraron ser os mellores do Open Nudesa.

As instalacións da Feira Internacional de Galicia son xa un espazo de referencia para estes cans e os seus guías. Xornadas de adestramento, formación e tamén competicións como a que se vive esta fin de semana.

"Estamos vendo os cans máis rápidos de España competindo nun Open, onde hai premios en metálico e regalos dos patrocinadores. Durante a fin de semana puntuamos tamén para o campionato de España", explica Tania López, organizadora da competición.

Entre os participantes, o actual campión de España, un galego, Jacobo Martí.

"A verdade é que estamos adestrándonos moito e loitando. Tivemos moi bos resultados esta fin de semana e hai que seguir nesta dinámica. Xogas cun can e estás condicionado tamén polo seu benestar. En Galicia temos varios campións de España e grazas ao clima podemos adestrarnos todo o ano e ser máis competitivos ca o resto", di Jacobo Martí, campión de España de Agility

E outro campión, de paragility e como el mesmo di, de superación persoal.

"O que me ocorreu foi que ía no autobús e un drogadicto asaltou unha señora. Eu metinme no medio e deume unha malleira. Eu xa estaba medicado pola miña saúde e xunto co que me puxeron en Urxencias tiven un fallo renal e estiven encamado tres anos. Nesa situación pensaron que a miña cadela sería unha boa alternativa para animarme. Para min o máis importante é esa cadela, débolle a vida. Os border collie sempre queren xogar e vante beliscando. Se estaba na cama tirábame do pé, para que puxese os zapatos e saíse a pasear."

Unha mostra dese vínculo guía-can do que sempre se fala no agility, pero que neste caso chegou moito máis aló.