Un mel galego sitúase entre os 30 mellores do mundo nun concurso nos Estados Unidos

O mel monofloral de castiñeiro que sae das colmeas de Álvaro Martínez suma moitas distincións. Dezabellas gañou o ouro no concurso Mel 5 Estrelas da Asociación Galega de Apicultura, e seguiu con premios en Londres, París e nos Estados Unidos, onde quedou entre os 30 mellores do mundo. Álvaro está encantado con estes éxitos.

"É unha satisfacción moi grande polo esforzo e o traballo que leva, combinado co outro traballo que é o meu habitual e, despois, a satisfacción de que un mel galego, de aquí de Lalín, estea entre os trinta mellores e poña en valor a calidade dos meles galegos".

Álvaro compaxina o seu traballo de apicultor co de protésico dental en Lalín. Comezou hai uns dez anos con dúas colmeas e agora ten 120 en produción en Soutullo e na zona do Candán. A última colleita xa a ten esgotada.

"Para este ano a demanda aínda foi máis da habitual e xa hai máis dun mes que acabamos a produción, pode quedar algún bote nalgunha tenda, pero a xente cada vez fala máis dela e anímase a probala e quen a proba, engánchase".

Para abastecer a demanda destes clientes satisfeitos, Álvaro pensa continuar co seu traballo de apicultor, medrar sen renunciar a unha produción tradicional.

"Chegar cada vez a máis padais, mantendo a calidade e conservando o medio natural como estamos a facer".

Con estes obxectivos, traballa xa para conseguir no mes de agosto unha boa colleita, que, segundo agarda, terá a mesma calidade que a do mel premiado.