Burela prepara a alfombra floral das súas festas patronais
Un cento de voluntarios colaboran neste exemplo de arte efémera feita en comunidade que a ser declarada de interese turístico galego
Os burelaos puxéronse mans á obra para lles dar cor ás súas rúas nas festas patronais. Ata un cento de voluntarios, organizados en varios grupos, colaboran na confección da alfombra floral que vai ornamentar a vila no día grande, o primeiro sábado de xuño.
"A alfombra floral de Burela distínguese da maioría de alfombras florais de Galicia pola temática, que cada ano é diferente. Intentamos non repetirnos, e levamos 34 anos xa con diferentes temáticas. É unha incógnita ata datas anteriores á alfombra, e este ano vai orientada ás dezasete comunidades autónomas", explica Martín Lestao, presidente da asociación cultural Burela Floral.
Como novidade, ademais de sal, area ou serraduras, tamén se utilizarán cascas tinguidas de cores nesta forma de arte efémera elaborada de xeito comunitario.
"Esa comunidade que se crea e que se fai, máis nesta sociedade actual en que nos volvemos cada vez máis individualistas e solitarios. Vir aquí e compartir chistes, grazas ou receitas, de todo, mentres se prepara o material, é o que fai o pobo", sinala Lestao.
Con máis de tres décadas de historia, o tapiz floral das patronais de Burela aspira a ser declarado de interese turístico galego.
