Marta castiga con máis choiva as zonas afectadas polo temporal anterior

A borrasca Marta vén complicar aínda máis a situación en Andalucía, onde o temporal que nos vai deixando, Leonardo, xa causou máis de 9.000 incidencias e obrigou a desaloxar arredor de 11.000 persoas.

Marta trae precipitacións constantes, en especial sobre as zonas máis castigadas. En Grazalema agárdanse 80 litros de auga por metro cadrado en doce horas. O mesmo en Ronda, en Aracena e na serra norte de Sevilla.

A comunidade andaluza ten 85 estradas cortadas e problemas de abastecemento de auga potable nas provincias de Málaga, Granada e Cádiz.

Preocupa a chuvia, pero tamén hai avisos polo mal estado do mar e polo vento, con refachos de ata 90 quilómetros por hora no interior e de 100, no Estreito.

O presidente andaluz pídelle ao Goberno central que active o fondo de continxencia e solicita tamén a axuda do fondo de solidariedade da Unión Europea para mitigar as perdas.

"Só no ámbito das infraestruturas autonómicas, só nas nosas estradas, o impacto das obras que se teñen que facer para volver a poñelas en marcha supera os 500 millóns de euros", explicaba o presidente Moreno.

Outra comunidade en aviso laranxa é Estremadura. Alí tamén se prognostican precipitacións abundantes nas zonas xa afectadas por acumulacións de auga e ríos en perigo de desbordamento.

O mapa de avisos toca tamén Castela, Madrid ou as Baleares. En Castela-A Mancha, por exemplo, emitiuse esta mañá unha mensaxe Es-Alert por risco de inundacións nas localidades bañadas polos ríos Bullaque e Guadiana, na provincia de Cidade Real.

"Agora mesmo a situación non é excesivamente preocupante pero pode variasr coa nova borrasca, que a poboación estea atenta que os servizos están para darlle a maior garantía de seguridade", puntualizaba o delegado do Goberno en Castela-A Mancha.

Este domingo aínda vai haber moitos avisos por mal tempo activados.