As Canarias, moi castigadas pola borrasca Therese, rexistran máis de 700 incidencias
Precipitacións intensas, estradas cortadas, cauces desbordados e voos cancelados conforman un panorama preocupante nas illas
A primavera e as Canarias son palabras que parecen xerar unha promesa de bo tempo, pero as illas están sendo castigadas duramente pola borrasca Therese. Un exemplo de vía cortada: a que une Ayacata e Tejeda en Gran Canaria, cunha rocha de grandes proporcións atravesada. Os desprendamentos nas estradas centraron tamén as incidencias na Gomera e Lanzarote. Hai xa máis de 700 incidentes rexistrados no conxunto das illas.
E máis de 30 concellos mantiñan pechados os accesos a cavorcos, pero algúns non podían resistir a tentación.
"Temos cultivos e vimos mirar", explica unha muller que contempla un barranco desde unha ponte . Recibe unha advertencia :"Teñan coidado". "Si, sabémolo", replica ela.
Non faltan os que bendicen a choiva como un don inesperado:
"Velo asi é unha marabilla. Había moitos anos que non viña así, moitísimos anos de verdade, e estamos encantados. Isto é unha gozada" conta un home compartindo escenario coa muller anterior.
A diferenza de onte, na mañá deste sábado viviuse unha certa tregua, pero as choivas torrenciais e os ventos de ata 100 quilómetros por hora regresaron pola tarde. Gran Canaria declaraba hai unhas horas o nivel de emerxencia 1, pero desmentía que a presa de Agaete estea "a punto de colapsar". O que queda é un longo traballo para superar os asolagamentos.
