León XIV chega este xoves ás Canarias, a última etapa da súa viaxe por España
O pontífice coñecerá en primeira persoa a realidade migratoria
As illas convértense en destino papal por primeira vez na historia
O papa León XIV, en Barcelona, minutos antes de coller o voo que o leva por primeira vez ás Illas Canarias (Kike Rincón/Europa Press)
O papa León XIV inicia este xoves a última etapa da súa viaxe por España. Tras o seu paso por Madrid e Barcelona, recalará este xoves e venres en Gran Canaria e Tenerife, con actos centrados principalmente na realidade migratoria.
Esta visita converte as Illas Canarias en destino papal por primeira vez na historia. Contra as 08:30 partiu desde o aeroporto internacional Josep Tarradellas Barcelona-El Prat e ten previsto chegar á base aerea de Gando, nas Palmas de Gran Canaria, ás 11:50 (hora galega).
Realiza así a visita soñada polo seu antecesor, o papa Francisco, que desexaba acudir ás illas para achegarse á realidade do fenómeno migratorio.
A axenda do papa nas Canarias
O primeiro discurso de Robert Prevost terá lugar no porto de Arguineguín. Ás 12:40 do mediodía escoitará o testemuño de catro migrantes de África e Latinoamérica e reunirase con voluntarios e entidades vinculadas á atención humanitaria. Ademais, realizará unha ofrenda floral, na que tamén estará presente Pedro Sánchez.
Posteriormente, ás 14:30 (hora galega) León XIV desprazarase á Catedral de Santa Ana, nas Palmas de Gran Canaria, para reunirse con bispos, sacerdotes, diáconos, relixiosos, seminaristas e axentes de pastoral das illas. No encontro, dirixirá unha nova mensaxe á comunidade eclesial canaria.
Xa pola tarde, ás 19:30, o Papa presidirá unha misa multitudinaria no Estadio de Gran Canaria, onde se espera a asistencia de ata 60.000 fieis procedentes de todo o arquipélago.
Este 11 de xuño será o penúltimo día do papa en España, que comezou este pasado 6 de xuño a súa viaxe, na que tivo unha apertada axenda, cunha trintena de actos ao longo da súa visita.
