Aemet eleva a laranxa o aviso por chuvia no oeste da Coruña
Galicia mantén tamén avisos amarelos por precipitacións e tormentas
Pontevedra e parte da provincia da Coruña volverán estar en aviso amarelo na madrugada do xoves
Europa Press-Arquivo / En directo cámara web da CSAG en Ortigueira
A Axencia Estatal de Metereoloxía (Aemet) elevou este mércores a aviso laranxa o nivel de risco no oeste da provincia da Coruña por chuvias intensas. A alerta estará activa, polo menos, ata as 18:00 horas, ante a previsión de acumulacións de ata 30 litros por metro cadrado nunha hora.
A mesma zona permaece tamén en aviso amarelo por tormentas, que poderán ir acompañadas de sarabia. O episodio afecta a Galicia pola entrada dunha fronte borrascosa polo noroeste da Península.
O aviso amarelo por precipitacións esténdese ademais a boa parte de Lugo, Pontevedra e Ourense, con maior probabilidade nas zonas montañosas do oeste e na Baixa Limia. As tormentas tamén poderán afectar as catro provincias.
Avisos para o xoves
De cara á madrugada deste xoves, Pontevedra e parte da Coruña activarán novamente o aviso amarelo por chuvias localmente intensas, entre as 00:00 e as 06:00 horas. Poderán superar os 15 litros por metro cadrado nunha hora.
O aviso afectará toda a provincia de Pontevedra e o interior e suroeste da Coruña. A previsión para mañá mantén ceo con intervalos nubrados e chuvia localmente fortes, ademais dun descenso das temperaturas e ventos do sur-suroeste, moderados en xeral e con intervalos fortes no litoral.
