Betanzos celebra esta noite a solta do Globo na honra de San Roque

As festas de San Roque de Betanzos vivirán esta noite o seu momento máis agardado. Coma cada 16 de agosto, milleiros de persoas seguirán o lanzamento do globo desde a praza dos irmáns García Naveira.

Polo momento, aínda sen armar, gárdano aquí, a carón da torre da igrexa de San Domingos, desde onde o van soltar esta medianoite. Esta formado por 16 pezas de papel. Unha vez depregado, o globo alcanza 25 metros de altura e máis de 50 de circunferencia.

"O globo constrúese básicamente con papel, anaquiño a anaquiño, anaquiños dun metro por sesenta. Eses anaquiños vanse pegando uns a outros, como se fosen os ladrillos dun muro", explica Emilio Pita, neto do impulsor do Globo de Betanzos.

Foi o avó de Emilio, Claudino Pita, quen comezou en 1875 a tradición de confeccionar o globo e lanzalo ao ceo na honra de san Roque.

"Non é só un espectáculo, eso é subxacente. O máis importante é a ofrenda que supón, a que fixo o meu avó a san Roque", asegura Emilio Pita.

Esta noite volverase renovar unha tradición que se vén celebrando nas festas do San Roque de Betanzos desde hai 151 anos.