Begoña Vázquez, de O Regueiro da Cova, gaña o premio Cociñeiro Galego 2024
Begoña Vázquez, de O Regueiro da Cova, gaña o premio Cociñeiro Galego 2024
É a primeira vez que unha muller consegue esta distinción
O galardón recoñece o labor de cociñeiros emerxentes que apostan pola cociña de proximidade
Era un dos momentos máis agardados do Foro Gastronómico. A verinesa Begoña Vázquez foi nomeada mellor cociñeira galega do ano.
É un recoñecemento ao labor de cociñeiros emerxentes, sensibles coas producións ecolóxicas e que utilizan produtos de proximidade.
Desde 2016 Begoña Vázquez dirixe O Regueiro da Cova, en Verín, unha aposta polo rural e pola cociña tradicional e enraizada.
"Ten algo de innovación, pero intento buscar eses sabores antigos que non quero que se perdan e darlles un toque de novidade coas novas técnicas que temos agora", explica.
Demostrouno no primeiro taller desta edición do Foro Gastronómico, cociñando varios pratos de porco celta. Begoña Vázquez é a primeira muller que gaña o Premio Cociñeiro Galego.
"Hai moitísimas máis que están detrás. Este premio é para elas e para todas esas mulleres que estiveron sempre nas cociñas, que seguirán estando e que teñen que saír".
Talento, paixón e moitísimo traballo. Son a base do éxito de Begoña Vázquez, que despois do seu paso polo Foro vai poder gozar do seu primeiro día libre en dous meses.
_frame_5592.png)
