Bautismos de mar, visitas a buques e pesca solidaria: a Armada abre as súas portas á cidadanía de Ferrol

A Armada achegará entre os días 8 e 11 de outubro as súas unidades á cidadanía de Ferrol con motivo da Festa Nacional, en concreto, o programa inclúe bautismos de mar, visitas a buques e instalacións, actividades con centros educativos, exhibicións, concertos e unha xornada de pesca solidaria.

O obxectivo é que a cidadanía coñeza de cerca os seus buques, instalacións e os labores que desenvolven os seus profesionais. Deste xeito, entre os días 8 e 11 de outubro, o Arsenal de Ferrol, o Terzo do Norte de Infantería da Mariña, as escolas de especialidades e o Museo Naval acollerán distintas propostas dirixidas tanto á poboación xeral como a centros educativos.

Segundo detallou a Armada nunha nota de prensa, o programa inclúe tamén unha exhibición da Unidade Cinolóxica, un concerto da Unidade de Música do Terzo Norte, actividades deportivas con centros de Formación Profesional e unha xornada de pesca solidaria a beneficio da Cociña Económica de Ferrol.

Máis detalladamente, o día 8 terán lugar os bautismos de mar para centros educativos e persoal civil entre as 09:30 e as 13:30 horas no Tren Naval; a exhibición da Unidade Cinolóxica entre as 18:00 e as 18:30 horas na Praza da Constitución e un concerto da Unidade de Música do Terzo Norte ás 20:00 horas no Teatro Jofre.

Durante a xornada do venres, 9 de outubro, continuarán os bautismos de mar para colexios e civís no Tren Naval de 09:30 a 13:30 horas. De forma paralela, a Escola Antonio de Escano recibirá visitas escolares e acollerá actividades deportivas entre as 10:00 e as 13:00 horas, á vez que o Terzo do Norte de Infantería da Mariña ofrecerá visitas concertadas nas súas dependencias.

Ademais, a fragata Méndez Núñez abrirá as súas portas no Arsenal de Ferrol en horario de mañá -10:30 a 13:00 horas- e tarde -15:00 a 19:00 horas-.

O sábado, 10 de outubro, a actividade no Tren Naval ás 11:00 horas estará reservada aos bautismos de mar para o persoal da Armada e os seus familiares. Así mesmo, o Arsenal de Ferrol celebrará unha xornada de portas abertas para visitar tanto os patrulleiros Serviola e Sentinela como a fragata Méndez Núñez en pases de 10:30 a 13:00 horas e de 15:00 a 19:00 horas.

Para rematar, a programación concluirá o venres, 11 de outubro, cunha ampla oferta de visitas e iniciativas públicas. O Arsenal de Ferrol manterá as visitas aos patrulleiros Serviola e Sentinela -10:30 a 13:00 horas e 15:00 a 19:00 horas-, mesmo horario en que o Terzo do Norte despregará unha exposición de vehículos e material con visitas guiadas.

Pola súa banda, a Escola Antonio de Escano abrirá de 10:00 a 13:30 horas e de 16:00 a 18:30 horas. A xornada completarase coa exposición de material da Unidade de Mergullo de Ferrol e unha iniciativa de pesca solidaria a favor da Cociña Económica na Estación Naval da Graña.