Evacúan o condutor dunha furgoneta tras chocar cun camión en Melide
O accidente tivo lugar a primeira hora da mañá na N-547, á altura do Barreiro
Os bombeiros liberaron o condutor da furgoneta, que foi trasladado ao CHUS
O accidente producíase poucos minutos despois das nove da mañá, cando un camión de mercadorías e unha furgoneta bateron frontalmente. Polo forte do impacto, os bombeiros tiveron que liberar o condutor da furgoneta que quedara atrapado. Os traballos foron bastante complicados, porque varias partes do vehículo estaban esmagadas.
O condutor foi evacuado nunha UVI móbil ao Hospital Clínico de Santiago.
Por mor do choque, foi necesario cortar o tráfico nos dous sentidos na N-547 á altura do concello coruñés de Melide. Alí traballaron xunto cos sanitarios, bombeiros de Arzúa, Garda Civil de Tráfico, Policía Local, Protección Civil e persoal de mantemento da vía.
A Garda Civil está investigando as causas do accidente, pero varios veciños apuntan a un exceso de velocidade por parte da furgoneta.
