Baixan as temperaturas en Galicia, especialmente na provincia de Ourense

Levamos días sen entender moi ben as présas deste verán adiantado. Pero o caso é que por fin decidiu dar unha tregua.

"Esta sería a miña temperatura ideal para todo o verán". "Por certo que se notou moito, estes días a estas alturas xa había 23 ou 24 graos e hoxe non creo que pase dos 18. eu creo que está perfecto aquí o tempo".

En Ourense as temperaturas quedaron onte por riba dos 31 graos, nunha xornada propia do verán. A máxima prevista para hoxe roza os 27.

"Vou camiñando ata o ximnasio entón non me fai falta chaqueta, pero sí, xa vexo que a xente quere chaqueta. Facía falta un pouquiño de baixada porque é demasiado para o mes que estamos". "Está vindo demasiado anticipada a calor e demasiada cantidade, porque 39 graos que houbo eses días, é excesivo".

Hoxe, despois de días co verán adiantado, volvemos atopar algunha manga para o fresco da mañá.

"Agradécese moito porque estivemos nun forno, ía unha calor insoportable, e agora vai calor, a temperatura é boa, pero o fresco este agradécese". "Eu estou encantada con este cambio. Hoxe está unha mañá perfecta, boísima, e a gozar dela".

Nótase o descenso especialmente en Ourense, pero esta baixa nas temperaturas é perceptible tamén no resto de Galicia, onde as máximas quedan hoxe entre os 20 e os 24 graos na costa e os 26 nas zonas de interior.

"Pola tarde vanse abrir clarencias de xeito evidente, precisamente onde máis será no sur da comunidade, nesa provincia de Ourense e tamén de Pontevedra. As nubes de tódolos xeitos canto máis o norte estarán un pouquiño máis presentes. Non desbotamos aínda algunha pingueira, sobre todo por esa zona de Bares, Ferrol Terra e na Mariña máis occidental", explica Ana Celia Vázquez de 'O tempo'.

As temperaturas seguirán baixando lixeiramente nos vindeiros días. Unha despedida da primavera, din, como corresponde, e xa collendo forzas para a chegada do verán.