Baixan as temperaturas e agárdase neve por riba dos 500 metros este día de Nadal
As máximas baixarán de forma xeralizada en toda a comunidade
Ao final do día agárdanse chuvias que serán en forma de neve nas zonas altas
Persoas gozan da neve en Manzaneda
Galicia rexistrará unha baixada das temperaturas durante a xornada do xoves de Nadal, con probables chuvias a última hora que serán en forma de neve a partir dos 500 metros de altitude.
Segundo a previsión de MeteoGalicia, ao longo do día predominará a influencia anticiclónica, aínda que unha fronte entrará en Galicia nas últimas horas da xornada.
Con esta situación, agárdanse ceos con intervalos de nubes e claros e algún chuvasco ocasional, máis probable no terzo norte.
Xa pola noite, os chuvascos afectarán á metade oeste do territorio e deixarán neve por riba dos 500 ou 600 metros.
As temperaturas experimentarán un descenso xeral, máis acusado no caso das máximas. As máis baixas espéranse para as provincias de Lugo e Ourense e poderían baixar dos 0 graos. Vigo e Pontevedra poderían chegar aos 11 graos de temperatura de máxima.
Os ventos soprarán moderados do nordés, con intervalos fortes no litoral atlántico.
