Avogados de Lugo fan asesoramento xurídico de balde aos afectados polo lume

A cidadanía directamente afectada polos incendios, aquelas persoas que perderon as súas vivendas, están nunha situación de vulnerabilidade evidente e precisan axudas e asesoramento. Por iso ante os "graves prexuízos persoais, materiais e económicos" derivados desta catástrofe, os avogados de Lugo ofrecen asesoramento de balde.

"Haberá diferentes situacións, haberá supostos en que se dirá o tipo de axudas ás que pode acudir, ímonos poñer en contacto coas administracións públicas, e despois se o procedemento é xudicial orientalos na vía máis adecuada para que acaden o que perseguimos que é que se lles indemnice as perdas que tiveran", di Félix Mondelo Santos, decano do Colexio de Avogados de Lugo.

Para iso crearon un Servizo de Asesoramento Gratuíto a Vítimas de Incendios, con profesionais voluntarios. A finalidade é dar resposta inmediata e coordinada ás necesidades xurídicas das persoas afectadas.

"No tema de seguros no caso das catástrofes cubriríao o Consorcio de compensación de seguros e unha parte limitada. Pero aquí o que queda por investigar é se hai algunha responsabilidade da Administración. Para os avogados é importante saber onde se produciu o incendio, se foi provocado ou non, se había un plan de prevención específico para ese monte ou non, porque a Administración pola lei de montes está obrigada a previr todo isto que sucedeu", engade.

O servizo dos avogados terá carácter orientativo, facilitando información sobre "reclamacións a seguros, subvencións e axudas públicas, e responsabilidade patrimonial da Administración".